ARG: Pixabay / David Mark
KANPOAN

“Ta ezer ez da berdin”: Gora Gora Fest eta zuzeneko emanaldiak

Argiak apaltzen hasi dira, besaulkian goxo eta epel bilduta, haurra eta gurasoa, soinu bat antzeztokiaren albo batetik, kirrinka bat ohol gainean, eta ondoan dugun txikia urduri, begiak biribil zer gertatuko zain… ikuskizuna hasi besterik ez da egin.

Nork ez du sentitu zirrara hori etxekoen edo lagunen konpainian eta antzokiko iluntasunaren babesean? Ez, ezer ez da berdin zuzenekoan. Izan ere, kulturak, hizkuntzak eta emozioak bat egiten duten unea da, askotan, emanaldia. Haurtzaroan eta nerabezaroan bereziki garrantzitsua da bizipen zirraragarriak euskaraz izatea, hizkuntza hau erabiltzeko motibazio iturri eta akuilu bilakatuko diren oroitzapen ederrak.

Kultur eta jarduera aukera ugari eta askotarikoak daude familientzat, eta aukera den lekuan hautua behar, gurasoen hautua seme-alabek emozioak pilatzen jarraitzeko. Horren beharrezko beti, eta are beharrezkoago orain ere.

Hautuaren abiapuntu dugu aukera, bai, nora jo, beraz, aukera bila? Bada, Nafarroako Gobernuak Gora Gora Fest kultur zikloa antolatu du Euskararen Nazioarteko Egunari begira. Hala, azaro osoan zehar eta abenduaren 11ra bitarte, herrialde osoko 50 bat herritan ikuskizunak antolatu ditu, tokiko erakundeen laguntzarekin: “musika, antzerkia, bakarrizketak eta ipuin antzeztuak, ipuingintza lantegiak, bai eta online bidez ikusteko saioak ere”. Iparretik hegora, sortaldetik sartaldera, antzokira sartu besterik ez du ikusleak.

Ikuskizun horiek, eta beste hamaika ere, ERAren Agendan bilduta topatuko dituzue, beti bezala, handik hona eta hemendik hara ibiltzeko motibo ugari bildu ditugu: antzerki, musikal, ipuin, pailazo…

 

CC BY-SA 4.0