Sehaska kantak umeei kantatzen zaizkien abestiak dira, erlaxatu edo lokartu daitezen. Esan daiteke kultura guztietan abesten direla, unibertsalak direla.
Normalean, gurasoek kantatzen dizkiete seme-alabei eta horien bitartez segurtasuna, babesa edo hurbiltasuna transmititzen zaie umeei. Gurasoek ez dute zertan ahots ederrik izan, egoera horretan umeak babesa baloratzen baitu, ez ahotsaren kalitatea. Beraz, sehaska kanta hurbileko pertsona batek kantatzea da eraginkorrena, umea lasai lokartu dadin. Izan ere, niniak haurdunaldiko bosgarren hilabetetik entzuten du amaren eta haren ingurukoen ahotsa. Ordutik ezagutzen dituelarik ahotsak, efektu lasaigarria dute berarengan.
Euskaraz ere sehaska kanta ederrak iritsi zaizkigu belaunaldiz belaunaldi, ahoz transmitituak. Gehienak idatzi edo grabatu ez direnez, kantu asko aldatuz joan dira eta beste batzuk, tamalez, galdu egin dira.
Nolanahi ere, ERA.EUS atariko atal honetan hainbat sehaska kanta topatuko dituzu, baina horiez gain, azpimarratzekoak dira Alan Lomax ikerlari estatubatuarrak 1952an eta 1953an grabatu eta honako disko honetan aurki daitezkeenak. Biak Nafarroan grabatuak dira, bata Erratzun eta bestea Uitzin, eta biek titulu bera duten arren, ez dira berdinak:
- Erratzun, Alan Lomaxek Maria Fagoagari grabatu zion Haurra egizu lo kantua, 1953ko otsailean.
- Uitzin, Lomaxek Juanita Aspiroz grabatu zuen 1952ko abenduan Haurra egizu lo kantatzen.
